(ژ شەڕڤانێن ڕۆژئاڤا و فەرماندەیێ وان هێژا مەزڵووم کۆبانی ڕە دیارییە)
هەلبەست : ساکار کامل ئوسمان
..
ئەز ژ پێتا ئاگرەکی دسۆژم
بەدەنا من شەواتەکە ئەبەدییە
هۆئەی فەریادڕەسێ من
جانێ من دبن کەڤرانڕا هەڕکی ناڤ پەڕێن پیتەکا ئەیتوونێ
هەی هۆ فەریادڕەسێ من
پێژنا زارۆکان فڕیا ناڤ پەڕێن شعرەکا دڕیایی !
ب پەیڤێن هەر هەلبەستەکێ ڕە نقوومی گۆڕەکێ بوو
هەی هۆ فەریادڕەسێ من
ئەڤ ئەردە شەق بوویە !
د هەر شەقبوونەکە وی دە
گۆمەکە خوونێ دهەڕکت ناڤ گیانێ من
هەی هۆ فەریادڕەسێ من
دزانم ئازادی ژ گولەیێن تڤەنگا تە
ژ دایک دبت بێ هەمپا
توو زانی ؟
… …
برینان ئەم داقوتاین،
ڕەهێن دیرۆکێ نابزدیێن
کوورتر د ئاخێ ڕا دچنە خوار
ڕۆژئاڤا ، هیمێ شۆڕەشزانییا دیرۆکێ
دبن سیا عەورێن باران گڕتی ،
گاڤا کو ببارن ، باران سروودا سەرکەفتنەکێ دچڕت
هەموو لەهی بەر ب دەریایی دچن
بەروڤاژی !
گاڤا کو ببارن ،
ئەرد دبتە شانۆیەکا کەسکەسۆر ،
نمایشا کەزیێن شەڕڤانەکێ
ئازادی پێڤە دهێتە هەلاویستن
…. ….
ئەز ئاتەش و ئاگرم
برینا من پر کوورە ،
ژ فەزایەک دوور بلندی ئاخا سەر سینگێ شەرڤانەکی دبم
ئەز شەرڤانم پێتێن ئەیتوونێ ژ کڤانێ نیگایەکا چاڤێ منێ ڕاستی دچن
شەق شەق ، ئەرد پەرتەوازەیی گۆمەکە هەژیایی دبە
ل سەمتا بایەکێ ڕۆژئاڤایی
ل ژێر لنگێن هەسپێن سوارچاکێن چاڤنەترس
ئاخ ئاڤس دبە و د لەرزە
د قولاچکێن لەرزینا وێدا
شۆرەشەک یەکتا ژ دایک دبت
زێمارا دایکا شەرڤانەکێ دکە کەنەک
هەموو دەرگەهێن ئاسێ د ڤێ ئاسێگەهێدا ڤەدکە
دەستێن وێ دایکێ دناڤ گولیێن کەچا وێ یا هڤدە ساڵیدا
سنوورێن خاکا وەڵات ل کنارێ ڕۆژێ دپیڤن
مەستبوونەک زەمینی دادپۆشت
هەموو شەڕڤان سەرخوەشدبن
سەرخوەشدبن ب پێکێن شەرابا شۆڕەشێ
سەرمەست دبن ب ئازادیێ
… …
ئەڤ دەر ڕۆژئاڤایە
ب شەوقا گولەیەکە ئارمانجگرتی
هەموو برین د خەو دچن
هەموو گری باردکن
هەموو هیڤی ژدایک دبن
هەموو ژیان د گرنژە
ئێدی ڕۆژ ئاڤا نابت !
لسەر ملێن کەچەکە شەرڤان
و لسەر سینگێ بایەکی سار هێدی هێدی د خەودچت
هەموو ئازارێن برینان
دکەڤن سەمایەکا تەیسۆک
و ژ ڤی وارگەهی باردکەن
بەر ب دوزەخێن پشت سنووران
ئەڤ دەر ڕۆژئاڤایە
دەرگەهێ خوون و ئاگرەکی قەشاگرتی
دەرگەهێ ئازادیێ
کەڤۆکەک ل ئەسمانێ وێ ب هێمنی ب ڕەفا خوەڕە
د فڕە
… …
ڕۆژئاڤا : هیمێ خوەڕاگرییا شۆڕەشان
ڕۆژئاڤا : گولدانا گولێن بەهاران
ڕۆژئاڤا : ئاخا ل بن لنگێن شەرڤانان
ڕۆژئاڤا : جەفاکێشا نەیارێن ڕۆژێ
ڕۆژئاڤا : گۆرستانا دوژمنێن ڕۆناهیێ
ڕۆژئاڤا : تیڕێژێن ڕۆژا هێژی ئاڤا نەبوویی
ڕۆژئاڤا ، وەڵات ، مان ، ئایندە و زاتێ ئاخەکا کو ئەلندا سبەکا ب گڕنژین پەچنی
ل ڤێدەر
عشق ، هێڤی و تڤەنگەک
ئاخ و وەڵات و شەرڤانەک
ل ڤێدەر
کەزیێن لێکبادایی یێن شەرڤانەکێ
چەک ئوو قەفتەکە گولێن شلێرێ
ل ڤێدەر ،
ڕۆژەک کو چ جاران ئاڤا نابت !
هەلاتنەک ئوو هێڤییەک
ل ڤێدەر
عاشقێن بەدەنا دەشتێ
بوستانەک ژ دارێن زەیتوونێن عەفرینێ
لەهیەک ژ بارانێ
ئوو ڕەنیەک ژ بەفرێ
ل ڤێدەر
جەنگ ، ئاڤێستا ، هەڤرین ،
ئوو ئازادی
ل ڤێدەر
عەدولەک ئوو
هەزار دەروێش
ل ڤێدەر
هەموو دنیا
هەموو شەڕ
هەموو ئاسێگەهــ
هەموو هژیان
هەموو شەقبوون
هەموو برین
ئوو شەڕڤانەک
ل ڤێدەر
هەموو سنووربەزێن
هەموو نەیارێن عاشقان
هەموو دەرزێن د لەشێ دەشتێ
هەموو ڕێکبەند
ئوو مەزڵوم کۆبانییەک !
ڤێدەر ڕۆژئاڤایە
خاکا خوداوەندێن ئاشتی و هێمنیێ
خاکا تەکۆشان و جانفیدایێ
هۆۆۆ ئەی فەریادڕەسێ من
برینێن مە یێن دەرزی بدروو
بوخچکا مە پڕ بکە ژ دیرۆکەکا بێ میناک
دا ئەم ژی ڤەشێرن د قولاچکێن ئازادیەکا هێژی ژ دایک نەبوویی دا !
دهۆک ٢٠٢٠
