ئێدواردۆ گالیانۆ
شوان ئەحمەد كردویەتی بەكوردی
دەمەوێت كەمێك باس لەوەبكەم كەچۆن و بۆچی بووم بەنوسەر.
سەرەتا، دانپێدانان: هەر لەمنداڵیمەوە، هەوڵمدا ببمە یاریزانی تۆپی پێ. هەتا ئێستاش هەر باشترین یاریزانم، بەڵام ئەوە تەنها لەخەونمداو كەبەئاگادێمەوە، دەزانم دوو قاچی خوارم هەیەو چارم نییە جگە لەوەی هەوڵی بوون بەنوسەر بدەم.
هەوڵمداوەو تائێستاش هەر لەهەوڵدام، بۆئەوەی بەچەند وشەیەكی كەم، زۆر شت بڵێم. لەسەر حیسابی ڕەوانبێژی، سۆراخی وشە ئەبستراكتەكان بكەم. نوسین ئەوساو ئێستاش كارێكی قورسە، بەڵام زۆربەی جار هەستێكی قوڵ و چێژێكی گەورەم پێدەبەخشێت، بەدوور لەگۆشەگیری و بیرچونەوە.
هەوڵمداوەو هەوڵیش دەدەم وەك پێویست كارامەبم، تافێری فڕین ببم لەتاریكیدا. هەوڵمداوەو هەوڵدەدەم، هەموو ئەو درۆو دەلەسانە هەڵبێنمەوە كەڕۆژانەو بەناچاری دەرخواردمان دەدرێت.
هەوڵمداوەو هەوڵدەدەم، سەختگیربم دەرهەق بەو بڕیارانەی سەردارو سەركردەكانی جیهان دەری دەكەن، بڕیارگەلێك كەدژی ویژدانمان و دژی لۆژیكی سەلیمە.
هەوڵمداوەو هەوڵدەدەم، گریمانەی ئەوەبكەم كەنابێت بێلایەن بم. نابێت ببمە ئامانجی شتێك كەبەویستی خۆم نەبێت، چونكە ئەوە دژ بەخواست و ویستی مرۆڤایەتیە.
هەوڵمداوەو هەوڵیش دەدەم، بەرپەرچی ئەو پەندە كۆنە بدەمەوە كەدەڵێت: (مرۆڤ گورگە بۆبرای خۆی). ئەوە درۆو دەلەسەیە. گورگ یەكتری كەلەپاچەناكەن، ئێمە تەنها بونەوەرێكین دەستمان بەكوشتنی یەكتر ڕاهاتووە.
هەوڵمداوەو هەوڵیش دەدەم، لەڕێی نوسینەوە ئەوپیاو و ژنانە بدۆزمەوە، كەحەز بەدادپەروەری و جوانی دەكەن. ئەوانە كوڕ و كاڵی دنیاكەی منن، بەدەر لەوەی لەكوێ لەدایك بوون یاخود چۆن ژیاون و بەدەر لەسنوری ڕۆژگار.
هەوڵمداوەو ئومێدەوارم و هەر هەوڵدەدەم لای ڕاست بگرم، كەهەمیشە لەلای چەپدایە، بۆ خاتری شەڕی سەختی هەمیشەیم، دژی سوكایەتی و بەكەم گرتن.
هەوڵمداوە و هەوڵیش دەدەم (بڕوام پێبكەن مەسەلەكە ئەوەدێنێ)، ڕەنگە بتوانین ئەو ڕستە بەناوبانگە بگۆڕین كەویلیام شكسپیری هاوڕێم، نوسیویەتی و دەڵێت:
بەڵێ، ژیان حیكایەتێكە، گەمژەیەك دەیگێڕێتەوە. پڕ پڕە لەهەراو زەناو توندوتیژی و هەموو شت بەیان دەكات!
گالیانۆ لەبەرواری 9/ئایاری/2013 ئەم گوتارەی پێشكەش كردووەو ئەویش لەمەراسیمی وەرگرتنی خەڵاتی سەنتەری (هیڤن) بۆ زانستە كۆمەڵایەتیەكان لەویسكۆنسنی وڵاتە یەكگرتووەكانی ئەمریكاو خەڵاتەكەش لەپای نوسین و بەرهەمە ئەدەبیەكانیدا بووە.
