هیلال ئیبراهیم-یۆنان
-١-
شاعیر بوومەتەوە و عاشقانە ئەژیم
دەست بۆ برینى قوڵى مێژوو ئەبەم،
لەدەریاکان وورد ئەبمەوە و لەدوورەوە لە مانگ ئەڕوانم،
حکایەتى بێبەریکردنى شیعر لە مێژوو کۆتایى پێ دێنم و
یاساکانى نەمرى ئەگێڕمەوە.
ئەمەیە دوا گەڕانەوەم بۆخۆم.
شاعیر بوومەتەوە و عاشقانە ئەژیم
عاشقانە بیر لە مارو مێروو،
گژوگیاو سەوزى ئەکەمەوە.
ئەمەیە دوا گەڕانەوەم بۆ عەشق.
-٢-
شیعر دائەڕێژمەوە
دارگوێزەکان هەڵئەکێشم و ئەیانگوێزمەوە بۆ شوێنى ڕاستەقینەى خۆیان
سنەوبەرەکان بۆ بەرزەخ و
گوڵەکانیش بە ئەسپێکا ئەنێرمە ماڵتان.
چیم هەیە بۆ تۆ…؟
جگە لە گۆرانیەکى بێکۆتایى لەبارەى دەریاو ئاسمانەوە.
-٣-
ژیانێکى پەتى ئەژیم،
ئارامیەکەى نێو دڵم ئەنێژم و ئەیکەمە باخچە
وەک درەخت،
وەک باڵندە، وەک گیاندار ئەژیم.
یاقوتەکەى نێو دڵم پاک ئەکەمەوە لەتەپوتۆز،
وێنە وونبووەکەى خۆم لە ڕۆحما ئەدۆزمەوەو
ڕەنگى نوێ ئەنەخشێنم،
دەنگى نوێ تۆمارئەکەم و
گڕوتینى تازە دەبەخشمە مێژوو.
-٤-
لەخۆم ڕا ئەمێنم لە تابلۆکەى نێو ڕۆحم
ئەگەڕێم بەدواى وونبوون لەخۆما
لەمندا جگە لە تۆ هیچى تر نییە هیچ،
نە ئاسمانى بەرین و
نە دەریاو زەریاکان و
نە لاپاڵى شاخەکان.
هیچى تر نیە لە دڵمدا جگە لە تۆ.
هیچى تر نیە لە ڕۆحمدا جگە لەتۆ.
