مەلەف: دار و کۆڵۆنیالیزم
نووسینی: دلێر کەمال
دیرۆک و هەر تشتێ ل سەر ئەڤێ ئەردنیگارییێ هەیى، ڕەسەنایەتى و بنگەهێ خوە هێدى هێدى و ب پلانەڕێژى ژدەستددەت یان ژى تووشى ئێش و ژانێن دژوار هەتا ڕادەیێ ئاسمیلەسیۆنێ دبیت. ئەڤێ چەندێ ژى، سەدەمێن خوە هەنە و ژ ڤالاهى و نەزانینێ نەهاتییە. لەوڕا پێدڤییە ب ئەقل و خواندنەکا نوو ڕووبڕووى پێشهات و نوویاتییان ببین، ژبەر کو پێشهات و نوویاتى سەرئەنجامێ پلان، کارکرن و خواندنێن پێشوەخت و ڕێکخستییە.
مژارەکا گرنگ و بالکێش کو بوویە جهێ ماتماین و گۆتبێژییێ، ئەو ژى مژارا بڕینا داران و تێکدانا خوەزایێ کوردستانێ ژ ئالییێ چەتە و هێزێن دەولەتا تورکیایێڤەیە. بێگومان ئەڤ بابەتە ب ژانە و کاریگەرییەکا ڕاستەوخۆ ل سەر هەست و دەروونێ مرۆڤێ خوەدان پرەنسیپ و ژینگەهـ و ژیاندۆست هەیە. وەها دکەت کو ئەڤ جۆرێ مرۆڤى د ناڤ خوەدا بئێشیت و ل دووڤ کارینێن خوە هەلویستەکێ وەربگریت و ئەو هەلویستە؛ کارڤەدانەکێ پەیدابکەت. کەواتە ئەڤ مرۆڤە هزردکەت، هەستپێدکەت، هۆشیارە و زەڕەرا هەر تشتى ب تایبەتى سۆتن و ژناڤبرنێ ب باشى دزانیت.
لێ بەلێ پرسا پرسیاران ئەڤەیە: ئەرێ مە چەند تاکەکەسێن وەها خوەدان هەلویست و هۆشیار ل ئەڤێ ئەردنیگارییێ هەنە، کو بکارن ب هەلویست و کارڤەدانێن خوە ڕایا گشتى بلڤینن و ببن سەدەمێ پەیداکرنا کێلیکێن گوهۆڕینێ و کاریگەرییەکا ئێکسەر ل حکومەت و دەستهەلاتداران بکەن، کو پێداچوون و لێزڤرینێ د بڕیار و بۆچوونێن خوەدا ل بەرانبەر مللەتى و پرسێن چارەنڤیسى بکەن؟ بەرسڤدانا ئەڤێ پرسیارێ دژوارى و ژانێن خوە یێن کوور هەنە، ژبەر کو ژ کەڤندا چارچلى گۆتییە: هەر دەستهەلاتەک ڕەنگڤەدانا گەلێ خوەیە. لەوڕا ئەگەر ل ئەڤێ پارزەمینێ جڤاکەکێ هۆشیار و ل سەر خوە هەبایە، ئیرۆ ب چ ئاوا و بەهانەیەکێ تورکیا و دارودەستەکێن ئەوێ، نەدکارین ژینگەها وەلاتى تێکبدەن و دارێن سەدسالى ب ئاسانى ببڕن یان ژى ب بێڕەحمانە بسۆژن!
ژ بەر ئەڤێ چەندێ د دەمێ نهادا پێدڤییاتییا مە ب مرۆڤەکێ هۆشیار و ل سەر خوە هەیە، کو بها و ڕێزدارییا هەر تشتى ب باشى بزانیت و ببیتە سەنتەرێ بڕیاردان و هزرکرنێ. ژبەر کو هەر ئەڤ مرۆڤێ هۆشیارە، یێ کو ڕێیێ ل کارەسات و ڕوودانان دگریت ل گەل ئەوێ چەندێ ژى ڕەدا ئاقلێ تەڤاهى دکەت. ئەو ئەقلێ تەڤاهى، یێ کو هەتا ڕۆژا ئیرۆ ژى زیانێ دگەهینیتە تاکەکەس و جڤاکى.
ب ئاوایەکێ هوور و کوور تاکەکەس و جڤاکێ مە ژ لایێ سەردەستانڤە هاتییەخواندن و ب باشى کەسایەتییا ئەوان هاتییەناسکرن، لەوڕا هەر زوو داگیرکارییا ئەقل، کەلتوور و فەرهەنگا ئەوى ژبەرى داگیرکرنا ئاخێ و سۆتنا داران هاتییەکرن! لەوڕا ئەو مللەتێ کەلتوور، فەرهەنگ، چاند و هونەرێ ئەوى هاتبیتەداگیرکرن، بێگومان بها و ڕێزا ئاخێ و بڕین و شەواتا داران و تێکدانا ژینگەهێ نزانیت! لەوڕا چاڤەڕێیا چ هەلویست و کارڤەدانان ژ ئەڤى تاک و جڤاکى ناهێتەکرن.
ل دووماهییێ دبێژم، پێدڤییە ژ هەموو ئالییان کار ل سەر تاک و جڤاکێ کوردى بهێتەکرن، کو ژ تارییێ دەربازى ڕۆناهییێ ببن. ب تنێ ئەڤ ڕۆناهییە دێ هۆشیارى و زانینێ ل گەل خوە هینیت و ڕێیێ وێرانى و ژناڤبرنێ گریت. هەگەر نا و پلانێن کارکرن و هۆشیارکرنێ نەهێنەدانان، تاک و جڤاکێ کوردى دێ هەر وەها چاڤگرتى و بێهەلویست و داگیرکرى مینیت. ب ئەڤێ چەندێ، نە بتنێ دێ سۆتن و بڕینا داران ب چاڤێن سەرێ خوە بینین، لێ بەلێ دێ ژدەستدانا هەر تشتى وەکو ڕۆناهییا ڕۆژێ بینین و ب تراژیدیایا خوە ل جهێ گرى و گەڕا ل چارەیێ تێر و تێر گرنژین!
