با و گەڵا

605
0
بڵاوکردنەوە:

“بەشێك لەهایكۆكانی كیا ڕۆستەمی”

شوان ئەحمەد كردوویەتی بەكوردی

لەنێوان من و تۆ و

مانگدا،

نهێنییەك هەیە

*

تریفەی مانگ

مانگ ڕووناك دەكاتەوە

*

سەروەختێك لەماڵ هاتمەدەر

كەس لەو ناوەدا نەبوو

جگە لەخۆم و مانگ

*

دڵی خۆم بۆ مانگ كردەوە

سەروەختێك خۆر هەڵات،

نهێنییەكەم ئاشكرابوو

*

لەكونی دەرگاكەوە

سەرما دێتە ژوورێ‌،

هەروەها ڕووناكیش

*

لەژێر تریفەی مانگدا

پێكەكە بەتاڵ و

دڵیش چۆڵ و هۆڵ

*

لەنێوان من و مانگدا گفتوگۆیەك هەیە

ئەو نابیستێ‌ و

منیش گوێم لێی نییە

*

چەند دووریت ئەی مانگ!

چەند نزیكیت

*

هەورێكی ڕەش

لەدواجاردا توانی،

مانگ لە ئامێز بگرێت

*

بێدەنگی مانگ

دڵم پارە پارە دەكات

*

گوڵەكانی بیابان

كەس بۆنی نەكردن

كەس نەیچنین

كەس نەیفرۆشتن

كەس نەیكڕین

*

لە كەناری زەلكاوەكەدا

چەند گوڵێكی سپی و

بۆنێكی ناخۆش

*

داخۆ دەبێ‌ درەختە گەورەكان

چۆن سەیری درەختە بچوكەكان بكەن؟

*

گەر لەبنی زەریادا كانییەك هەبێت

دەبێت شكڵ و شێوەی چۆن بێت؟

*

سەروەختێك هەنگێك لەسەر گوڵەكە نیشتەوە

پەپوولەكە فڕی

*

ستایشكردنی بەهار و

سەرزنشتكردنی پایز

فایدەی بەچی،

گەر بەردەوام ئەویان بێت و ئەمیان بڕوا

*

ڕۆژێكیان لە قەسابخانە

هەنگێك دای بەدەستی قەسابێكەوە

*

ئەمڕۆ باخچەكەم فرۆشت،

تۆ بڵێی درەختەكان بەوە بزانن؟

*

من تەنها لە دیمەنەكە ڕامابووم

كاتێك سێوێك لە درەختەكە

بەربووەوە

*

دوو هێڵی تەریب بەیەك

تەنها لێبوردەیی،

وایان لێدەكات بەیەك بگەن

*

منداڵەكە پرسیاری كرد

بۆ تا ئەو ئاستە

ماسی حەزی لە مەلەیە

*

نەگەڕانەوە

ئەو ڕووبارانەی بەرەو دەریا ملیان نا

ئەو سەربازانەی چوون بۆ جەنگ

ئەو هاوڕێیانەی بەرەو تاراوگە ڕۆیشتن

*

نووسین و خوێندنەوەی نەدەزانی

وەلێ‌ شتگەلێكی دەوت

نەكەس وتبوونی و

نەكەسیش نوسیبونی

*

لە پەنجەرەكەمەوە

دوو قوللە دیارن

وەك یەك بەرزن

دوو سەگ دیارن، یەكێكیان سپی

ژن و مێردێك، هەردووكیان تەنها

*

با

كۆپلە شیعرێكی

لە تەنافی ماڵە دراوسێ‌ دزی

*

عاشقە مایەپووچەكان

لە تاریكی شەودا

بە دوور لە چاوی حەس حەس

مانیفێستێكی شیعرییان دەركرد

*

ئەو كۆلارەیەی لە سەردەمی منداڵیدا

بەخشیم بە با

ئەمڕۆ لەسەر قەسیدەكەم نیشتەوە

*

بزمارێك لەپێمدایە،

هاوڕێكەم بەوە نازانێت

*

بەمەبەستی فڕین

كەوتنم تاقیكردەوە

*

ئەمڕۆ لە حەوشەی ماڵە بێدەنگەكەمدا

پشیلەیەك كۆترێكی خوارد

*

فەزای ماڵەكەم هەروا بێدەنگ دەبێت

تا ئەو ئافرەتە دەگەڕێتەوە ناوی كە دەیناسم

*

خەونم بینی كە ماڵەكەمم فرۆشتووە،

ئای لەو خەوە ناخۆشە

*

ماڵەكەم چوار ژووری نوستنی تێدایە،

لە ژورێكدا كەجێخەوێكی بۆ دوو كەس تێدایە

بە تەنها دەنووم

*

من گەورەی ماڵ بووم

ئەندامانی ئەو ماڵە یەكبەیەكیان ڕۆیشتن،

ئێستا هەریەكەیان لە جێیەكدا

سەرقاڵی ژیانن

*

لەماڵی دراوسێكەمان ئاهەنگێك هەیە

نازانم بەچ بۆنەیەكەوەیە

*

هەزار وەڵام لەسەر لێومە

كەس ناپرسێت

*

ئەم شەو

كەسێك دەبێت بەمیوانم،

دەزانم لە كوێ‌ دادەنیشێت

دەزانم چی دەخواتەوە

وەلێ‌: نازانم چی دەڵێت؟!

*

 

با بە زمانی گەڵا

گەڵا بە زمانی با

*

ئەندێشەكانیشم

تا ئەودیو دیواری ژوورەكەم ناڕۆن

*

من نە باشم و نەخراپ

خراپە لە من بێبەرییە

هەروەها چاكەش،

من منم

*

مەسەلەكە بە لێكتێگەیشتن دەستیپێكرد،

بەلێكتێنەگەیشتن تەواوبوو

*

بە درێژایی ڕۆژ باران دەباری

من بە درێژایی ڕۆژ نوستبووم

ئەو بەدرێژایی ڕۆژ دەگریا

*

هاوین بۆ تۆ

زستان بۆ من

بەهار بۆ تۆ

پایزیش هەر بۆ تۆ

*

بە زەحمەت ڕازی بوو

بە ناچاری وەڵامی دایەوە

بە شێنەیی گوزەشت

*

هاوڕێكانم

هەمیشە مایەی سەرئێشەن بۆ من

شتێكی نەیارەكانمم بە بیردا نایەت

*

چەند ساڵێك هاوڕێیەكی گیانی بە گیانیم بوو

وا دوو ساڵە

بە خوێنی سەری یەك تینووین

*

كۆشكی تەنیایم خاپوور بوو،

سەروەختێك میوانێكی ڕەزا قورس پەیدابوو

*

هاوڕێكانم لێم تێناگەن

ئاسان نییە تێگەیشتن لە كەسێكی دی

*

بەبێ‌ غەم

بێ‌ بەختەوەری،

بەرەو لایەك مل دەنێم

*

لە سەرەتای بەهاردا

لە ماڵ چوومە دەر

لە درێژترین شەوی هاویندا

لە ژێر درەختێكدا نوستم

لەپایزدا، با سەری بردم

*

بەدرێژایی شەو بیرم دەكردەوە

ئەوە وایلێكردم

بە درێژایی ڕۆژەكە بخەوم

*

خەونم بینی

كیسەڵێكی پیر

هەردوو چاوی هەڵكۆڵیم

*

خەونم بینی

سەربازێكم بەبێ‌ سەر

*

چەند زۆرن ئەوانەی وەك من شەو بێدارن

هەریەك لەگۆشەی تەنهایی خۆیدا

*

لەتاو شەقام پەنا بە ماڵەوە دەگرم

لەبەر ماڵەوەش پەنا بۆ شەقام دەبەم

*

گورگەكان دەلورێنن

سەگەكان دەوەڕن

من هەڵدەلەرزم

*

بەبێ‌ هۆ پێدەكەنم

عاشق دەبم، بێ‌ هیچ هارمۆنییەتێك

دەژیم بەبێ‌ فانتازیا

*

بڵاوکردنەوە: