هەموومان بە دۆزینەوەی زمان فریومان خوارد

1952
0
بڵاوکردنەوە:

ڕامیار محمود

 

(من  تۆم  زۆر خۆشئەوێت، جیهان  ئەمڕۆ  بۆ هەموو  شتێک لە  دواوەوەیە، منیش وەک جیهان بە هەمان شێوە درەنگکەوتم لە دۆزینەوەی تۆدا، هەرچەندە بیر دەکەمەوە، تەنها  یەک وەرزی ساڵە پێکەوەین، بیری وەرزەکانی تری ساڵ  دەکەم کە دێن، دەزانم  ئەم  جۆرەش لە  خۆدەربڕین، لە ئابڕووچوونەوە نزیکە بۆ شاعیرێکی وەک من)

 

لە  دڵی ناخۆشی خۆمەوە فێر بووم

دڵخۆشییەکی زۆر بۆ مرۆڤ لەگەڵ خۆمدا  بێنم،

ئەمەش ئەرکێکی شاعیرانە بوو.

ئەوەندەی من خوێندەواریم هەبێت،

هەموو مێژووی ڕاستەقینە

بە  قۆناغ نا، بەڵکوو بەئەرککێشانی شاعیرانەدا،

جیادەکرێتەوە.

ئەوەندەی ئاگام لەخۆم بێت  ،

هەموو خواکان مرۆڤیان بە ئەمانەت ،

بە  شاعیران سپاردووە.

کاتی ئەوە هاتووە باسی ڕووناکی بکەم،

چونکە  سەرەتا بەس  تاریکی هەبوو.

هەموومان بە دۆزینەوەی زمان فریومان خوارد.

بووین بە ژێر  هەرەسی وشەکانەوە.

ئەوەی  من  داوای دەکەم ئەوەیە:

ئەبێت بوون و ژیان لە زمان ڕزگار بکەین،

من لەم  جۆرەی قەیراندا،

خەیاڵم  بۆ  شۆڕش دەچێت.

شۆڕش واتە خۆمراندن و خۆزیندووکردنەوە،

گەڕانی لاشەیەکە بە شارەکاندا،

بێ ئەوەی زمانی هەبێت.

دەرگا داخراوەکانی ئازادی بە کلیلی لەش دەکرێنەوە.

مرۆڤ بەهۆکاری ئایدیۆلۆجی لەشی لێ  ونبووە،

وەک شاعیرێک فەرمان دەکەم،

بە گەڕانێکی سەرتاسەری بۆ جەستە.

ئێوە توڕەم  دەکەن

من کەی وتومە چی هەیە؟

من هاتم پێتان بڵێم چیتان لێ ونبووە

دووبارەی ئەکەمەوە: با توڕە نەبم.

ئێمە نین،

ئێمە هەین بۆ ئەوەی ونبین.

جێهێشتنی هەزاران نیشانە لەسەر ئەم ڕێگایە،

بەقەد بڕێک ئازادی هەڵە گرنگ نییە.

من نالێم  ژیان تازە نییە

هۆکاری  دوبارەکردنەوەی  پرسیارە  کۆنەکانم،

تەنها  ئەوە بوو کێشەکان  هەمان کێشەن.

ئەوەی  کە من ئەموت دڵ بۆ  جیهان دروست  دەکەم،

بە  زیندووکردنەوەی  دڵی  خۆم  کۆتایی هات،

هەڵبەت  ئەم  سەرئەنجامەم  بە  دڵنیاییەوە  خۆش  دەوێت…

بیرم  چۆتەوە کە من  پیر بووم،

لە  ڕاستیدا  تۆ  بیرو بردمەوە،

قەینا  ئەزانم کە ڕەنگە واش نەبێت ،

من  خۆم  ئەدەبیاتم  بۆیە هەلبژارد،

لە  کۆڵانەکانی  خەیاڵدا بژیم و،

بە  شێوەیەکی زانستی تەریق نەکرێمەوە…..

بەس  خۆم  دەزانم  چەندم  خۆش  دەوێی،

بە س  خۆ  ئەوندە  کەر نیم  وەک  شاعیرێک،

بهێڵم   کەس  پێم بزانێت..

من حەزم لێیە  لە  سەر  ئاڵۆزییەکانی  مرۆڤ  قسە بکەم،

پێناسەکەم  سادەیە،

مرۆڤ  دیاردەیەکی ماناییە،

دیاردە  واتاییەکان  چارەسەریان نییە….

هەمووتان  درەنگ  لە  داناییەکانی  من  تێ  دەگەن..،

هۆکارەکەی  ئەوەیە  من  زووتر  لە  کاتی  خۆم  هاتووم…

گوێتان لە  دەنگی پێکەنینی  منە ..،

کە  ئێوە سەرقاڵی ڕێککردنەوەو  ڕاستکردنەوەی  زمانن…

من  شاعیرم،

شاعیر  واتە  کەسێک  زمان چرچ و  لۆچ  دەکات…

من ناهێڵم دڵڕەقییە  بێسنورەکەتان،

وردوخاشم  بکات…

بە  دڵنیاییەوە  سەرقاڵی نوسینەوەی  مانیفێستێکی تازەم بۆ مرۆڤ،

کە لەوانەیە  لە ئاینێکی  تازەشەوە نزیک بێت،

ئەویش  ئەوەیە  خۆتت خۆشبوێت…

هەر  لە  سەرەتاوە  کە  هاتم،

هەموو  شتێک  تاریک بوو،

بۆیە خۆم  بەتەمای هیچ  ڕووناکییەک نەکردووە…

هێشتاش  لە  ڕووی زمانەوانییەوە  ئاشنایەتیم لە  گەڵ  ڕۆشناییدا نییە…

من شەڕم لە  گەڵ  ئەوانی  تردا  نییە،

جگە ململانێی  کێشە  ئاڵۆزەکانی  خۆم،

کەڕەنگە  هەر  فریای ئەوەش بکەم،

ئەوێش  ئەگەر  بکەوم…

بێ  شوناس لە ناو ئاپۆرای ئەو هەموو ناسنامەیەدا ،

دێم  و دەچم…

ڕەنگە بەمە  بوتڕێت  وێڵێک  یان نەزانراوێک،

کەڕەشەبای ناسنامەکان بە هەموو  لایەکدا توڕی  ئەدات…

بەس  من ئەمە ناو  ئەنێم چارەنوسەکەی  خۆم…

تەنانەت  کێ بە  کیێیە ، ئەگەر بشڵێم،

ژیانێکی  قارەمانانە.

لە  کۆتایدا ئێمە بەربوینەتەوە  ئێرە،

ئێرەش  هەر دەمێنێت،

ئێرە  جیهانە،

بەڵام ئێمە نا،

ئێمە  ژیانین…

بەلام من  ڕێک بەمە  ئەڵێم:نەخێر…

لە  کۆتایدا هەر  ئەوانە  فەرامۆشت  ئەکەن،

کە  خۆشیان ویستویت…

گلەییەکەی  من ئەوەیە،

کە  ئەڵێن  جیهان…

بەڵام ئەم شوێنە کە بە ناوەکەیدا   گەورەیە،

کە  تەسککرایەوە  لە  تۆ،

کە شوێنی  تۆ لەوێ نەبوو،

مانای  تۆ لە کوێیە…

من دەمێکە  شەکەت و ماندووم

من لە  راپەڕینی کوردەکانی ١٩٩١  وە  خەوم  زڕاوە

 

ئۆگەستی ٢٠٢٠

بڵاوکردنەوە: