من و خۆم

692
0
بڵاوکردنەوە:

كه‌س وه‌كو خۆم دڵی منی نه‌شكاندووه

كه‌سێك نییه‌ من و خۆم ئاشت کاته‌وه‌.

 

له‌ هه‌موو دنیا خۆش ده‌بم له‌ خۆم نه‌بێت.

 

كه‌س شك نابه‌م منی له‌ لادانێم

خۆمی شێت كردووه.‌

 

له‌ شه‌ڕی نێوان من و خۆما

من، من ناکوژم له‌ داخی خۆم

خۆم، خۆی ناکوژێ له‌ داخی من

 

له‌ شه‌ڕی نێوان من و خۆما

هه‌زاران ته‌رم كه‌وتوون، ته‌رمی خه‌ون و خه‌یاڵه‌كانم.

 

كه‌ من پێده‌كه‌نم خۆم ده‌گری

كه‌ خۆم پێده‌كه‌نێت من ده‌گریم.

 

من له‌ خۆم تێناگه‌م

خۆم له‌ من تێناگات

ده‌ڵێی هه‌ر یه‌که‌مان له‌ مه‌مله‌كه‌تێكی تره‌وه‌ هاتووین.

 

من له‌ خۆم هه‌راسانم، خۆم له‌ من هه‌راسانه‌

كه‌ چی هه‌ر پێكه‌وه‌ ده‌ژیین.

 

چۆن ده‌بێت؟ من و خۆم پێكه‌وه‌ بمرین

كه‌ هیچ شتێكمان له‌ یه‌ك ناچێت.

 

گوناهه‌ من و خۆم بخرێینه‌ یه‌ك گۆڕه‌وه

 

من لێره‌م و خۆم له‌وێیه‌

خۆم لێره‌م و من له‌وێم

كه‌چی به‌رده‌وام پێكه‌وه‌ین.‌

 

من خوێنم وه‌ك ڕووناكی ده‌دره‌وشێته‌وه‌

كه‌چی خۆم خوێنی پڕه‌ له‌ تاریكی

من بێبڕواترین پیاوی دونیام٠

خۆم دڵی له‌ ده‌ستی خواوه‌ندایه‌.

 

باران وه‌ك مناڵێك ده‌گری

من باران ده‌كه‌مه‌ كۆڵ

تا بیبه‌مه‌وه‌ بۆ ئاسمان

ماڵی من ئاسمانه‌

خۆم له‌سه‌ر زه‌وی به‌ جێده‌هێڵم

ئه‌ترسم ئاسمانیش پڕ بێت له‌ بێهوده‌یی.

 

من خۆم نیم

خۆم من نییه‌

ئه‌ی كێم؟!

 

من و خۆم (پێکه‌وه‌ و) ته‌نیاین

خۆم و من (ته‌نیا و) پێكه‌وه‌ین

من تا ئێستا خۆم نا ناسم

خۆم تا ئێستا من نا ناسێت

تارماییه‌ك له‌ گه‌ڵمایه‌

نازانم من (تارماییم) یان خۆم.

 

من گوناهه‌كانم ده‌خه‌مه‌ ئه‌ستۆی خۆم

خۆم گوناهه‌كانی ده‌خاته‌ ئه‌ستۆی من.

 

من نهێنییه‌كان له‌ خۆم ده‌شارمه‌وه‌

خۆم نهێنییه‌كان  له‌ من ده‌شارێته‌وه‌

من و  خۆم پێكه‌وه‌ نهێنین!

 

من ده‌ستم پڕه‌ له ڕووناكی

خۆم ده‌ستی پڕه‌ له ‌تاریكی

ده‌سته‌كان پڕن به‌ كراوه‌یی.

 

من ده‌ستم به‌ ڕه‌نگی په‌پووله‌كانه‌وه‌ ڕۆیی بۆ كه‌ناره‌كانی باران

خۆم په‌پووله‌كانی سپار‌ده‌ بێڕه‌نگیی بیابان و بێهه‌ستیی مه‌رگ

 

من له‌ په‌نجه‌ره‌ی سێوه‌كانه‌وه‌

هه‌موو شته‌کانم بازنه‌یی ده‌بینی

ئاسمان و سه‌رزه‌وی و مردن و ئه‌شق

خۆم له‌ باڵی  په‌پوویه‌كه‌وه‌ وه‌ك دڵۆپێ تاریكی ده‌چۆڕایه‌وه‌ ناو باغ

دووریی نێوان من و خۆم نانووسرێته‌وه‌ به‌ سێبه‌ری وشه‌

وه‌ك دووریی نێوان خۆم و من وایه

من سپی سپی ده‌چمه‌وه‌

خۆم ڕه‌ش ڕه‌ش ده‌چێته‌وه‌

نێوانی سپێتیی من و  ڕه‌شێتیی خۆم

وه‌ك نێوان ڕه‌شێتیی خۆم و سپێتیی من وایه‌

من له‌ ده‌ریاكاندا ماسییه‌ برینداره‌كانم تیمار ده‌كرد

خۆم له‌ بیابانه‌كاندا ماره‌كانی ده‌لاوانده‌وه.

 

ده‌ستم ناگاته‌ ڕه‌نگه‌كانی ناوه‌وه‌ی من

له‌ به‌ر (بێڕه‌نگیی) ده‌ره‌وه‌ی خۆم

ناهێڵێ گوێم له‌ ده‌نگی ناوه‌وه‌ی من بێ

ڕژاوه‌ به‌سه‌رما ده‌نگی ده‌ره‌وه‌ی خۆم.

ئه‌مه‌وێ گوێ له‌ هاژه‌ی خه‌یاڵی ناوه‌وه‌ی من بگرم

هه‌راسانی كردووم هاواری هیچی ده‌ره‌وه‌ی خۆم.

 

من له‌ وێنه‌كاندا له‌ نێوانی عه‌شق و مناڵیدا ڕاوه‌ستاوم

ده‌ستێكم كردۆته‌ ملی خه‌یاڵ و

له‌گه‌ڵ جوانیدا بزه‌ ده‌مگرێ.

 

خۆم له‌ وێنه‌كانیدا

له‌ نێوانی ته‌نیایی و په‌شیمانیدا ده‌سته‌كانی ‌شۆڕ کردۆته‌وه‌.

 

من نامه‌كانی خۆم ناخوێنمه‌وه

خۆم نامه‌كانی من ناخوێنێته‌وه‌

كه‌چی یه‌كتر بێنامه‌ ناكه‌ین

چاوه‌ڕێی وه‌ڵامی یه‌كترین.

 

من ده‌ڕۆم بۆ ده‌ریا تا شه‌پۆلێك بكه‌مه‌ گۆڕی خۆم

خۆم ده‌ڕوات بۆ بیابان تا من له‌ دووریی ئاو بمرم

من و خۆم بیابان و ده‌ریاین پێكه‌وه‌.

 

من شه‌وم

خۆم ڕۆژه‌

به‌ پێچه‌وانه‌ی سروشته‌وه

ئێمه‌ شه‌و و ڕۆژێکین پێكه‌وه‌ هه‌ڵدێین و ئاواده‌بین‌‌.

 

من نه‌بووایه‌ چۆن خۆمم ده‌ناسی

خۆم نه‌بووایه‌ چۆن منم ده‌ناسی

 

من له‌ خۆم ناچم

خۆم له‌ من ناچێ

به‌ڵام ئێوه‌ هه‌ردووكمان نابینن.

 

كه‌ بیر له‌ خۆم ده‌كه‌مه‌وه‌

ته‌واو هه‌راسان ده‌بم

كه‌ بیر له‌ من ده‌كه‌مه‌وه‌

خه‌ریكه‌ نه‌یناسمه‌وه‌

 

هه‌ر که‌سه‌ و خۆی له‌ شتێك ده‌شارێته‌وه‌

من، من له‌ خۆی ده‌شارێته‌وه‌

خۆم، خۆی له‌ من ده‌شارێته‌وه.‌

 

كه‌ شادومانی ده‌ڕژێته‌ دڵی منه‌وه‌

خۆم له‌ غه‌مناكیدا ون ده‌بێت،

 

من چیرۆكه‌كانم بۆ خۆم ناگێڕمه‌وه‌

خۆم چیرۆكه‌كانی بۆ من ناگێڕێته‌وه‌

من و خۆم دوو چیرۆك و یه‌ك به‌سه‌رهاتین

خۆم و من یه‌ك به‌سه‌رهات و دوو چیرۆكین

 

من ئاوێنه‌كانم (شکاند)  (تا خۆم) نه‌بینم

خۆم ئاوێنه‌كانی( شكاند) تا من نه‌بینێت.

 

ڕه‌نگه‌كانی من ناچنه‌وه(سه‌ر خۆم)

ڕه‌نگه‌كانی خۆم ناچنه‌وه‌ سه‌ر من

من و خۆم بێڕه‌نگین و هه‌زار ڕه‌نگی نائومێدیمان لێ ده‌ڕژێ.

 

من جوانییه‌کانم ڕاده‌وه‌شاند  تا بدره‌وشێته‌وه‌

خۆم خۆڵی گۆڕی منداڵه‌كانی ده‌كرده‌ چاوی جوانییه‌كانه‌وه‌.

 

سه‌رده‌می دره‌وشانه‌وه‌ی من

خۆم به‌ ته‌م دایپۆشی.

 

نانووسرێته‌وه‌ نزیكیی و دووریی نێوان من و خۆم

ئه‌مه‌ نووسینه‌وه‌ی نائومێدییه.‌

 

پێكهاته‌ی من خه‌یاڵ و فڕین و ڕامانه‌

پێكهاته‌ی خۆم كوشتنی خه‌یاڵ و فڕین و ڕامانه‌

من و خۆم كوشتن له‌ نێوانماندا ڕاوه‌ستاوه‌

نه‌ك ژیان.

 

من له‌ هه‌موو شتێك دوور ده‌كه‌ومه‌وه‌ له‌ خۆم نه‌بێت

خۆم له‌ هه‌موو شتێك دوور ده‌كه‌وێته‌وه‌ له‌ من نه‌ بێت

من و خۆم پێكه‌وه‌ین

هه‌مووشتێكمان له‌ یه‌ك دوور كه‌وتۆته‌وه‌

 

خۆم ئه‌یه‌وێت منی (بیر بچێته‌وه‌)‌

من ئه‌مه‌وێت خۆم

كه‌چی خۆم بیركردنه‌وه‌ی منی داگیركردووه‌

من بیركردنه‌وه‌ی خۆمم داگیركردووه.‌

 

من غه‌مه‌كانم ده‌شۆمه‌وه‌

خۆم ئاگر له‌ شادییه‌كانم به‌رده‌دات

من و خۆم ئاو و ئاگرێكی تێكه‌ڵین

 

خۆم منی پركردووه‌ له‌ بۆنی هه‌راسانی

ناتوانم بۆنی گوڵه‌كان بكه‌م.

 

كه‌ناری بێده‌نگی من پڕه‌ له‌ شوێنپێی خه‌یاڵ

خه‌یاڵی وه‌ك یادگار (به‌ جێ ماوه‌)‌

خۆم خه‌یاڵی منی كوشت

خۆم ده‌نگێكه‌ وه‌ك مردوو

مردوویه‌ك ژیانی داگیركردووم.

 

من له‌ تینوێتیدا ده‌مرم

خۆم گیرفانه‌كانی پڕه‌ له‌ ئاو…

ئاو من ده‌چمه‌وه‌ سه‌ر ڕه‌نگه‌كانی تۆ

من ده‌چمه‌وه‌ سه‌ر دره‌وشانه‌وه‌ی تۆ

من‌(ببه‌)

با له‌ خۆم دووركه‌ومه‌وه‌

ئاو خۆم ده‌چێته‌وه‌ سه‌ر ڕه‌نگه‌كانی مردن

خۆم ده‌چێته‌وه‌ سه‌ر تێكدانی یارییه‌كانی منداڵی

خۆم ده‌چێته‌وه‌ سه‌ر (بێهه‌ستیی) بیابانه‌كانی ته‌نیایی

خۆم بڕوای (به‌ نه‌رموشلیی ئاو نییه‌)‌

خۆم ناهێڵێ ئاو به‌ په‌نجه‌كانی باخچه‌كان بژمێرێت

خۆم ناهێڵێ ئاو تۆزی سه‌ر لێوه‌كان بژێنێته‌وه‌

ئاو من

من ده‌چمه‌وه‌ سه‌ر تۆ

من له‌ دڵۆپه‌كانی تۆیا ده‌توانم هێلانه‌ (دروست که‌م)

من له‌ دڵۆپه‌كانی تۆیا جێگام ده‌بێته‌وه‌

خۆم بیر له‌ ده‌ربه‌ده‌ركردنی ئاو ده‌كاته‌وه‌ بۆ بیابان

ئاو من ببه‌ من.

 

من و خۆم بۆ یه‌كتر ده‌گه‌ڕێین.

پێكه‌وه‌.

 

ئاو من و خۆم شه‌ڕمانه‌

كه‌س هه‌ست به‌م شه‌ڕه‌ ناكات

كه‌س (شه‌ڕگه‌ و) (کوژراو و) پێكراوی ئه‌م شه‌ڕه‌ نابینێ

ناوی ده‌نێم: شه‌ڕی كپ، شه‌ڕی من و خۆم ……….

ئاو من ببه‌ من

ئه‌مه‌وێت سه‌فه‌ركه‌م بۆ شارێك شوێنێك

دوور دوور كه‌ خۆمی لێنه‌بێت.

زۆر كه‌س هه‌ن شاره‌زای

زۆر شارو وڵاتن

كه‌چی من هێشتاكه‌ شاره‌زای خۆم نیم. چی ده‌وێت.

خۆم ده‌بینم

ئا ده‌یبینم هه‌ر بۆ ئه‌وه‌ی په‌ستمكات

هه‌ر بۆ ئه‌وه‌ی هه‌راسان بم

به‌ ناوی منه‌وه‌ قسه‌ده‌كات

ده‌گری پێده‌كه‌نێت كوفر ده‌كات

به‌ناوی منه‌وه‌ ده‌ڵێت: دڵم پڕه‌ له‌ نووری خواوه‌ند

ده‌ڵێت: له‌خه‌ونمدا خودام بینی خه‌ریك بوو

قاچی شكاوی چۆله‌كه‌یه‌كی ده‌گرته‌وه‌

به‌ناوی منه‌وه‌ ده‌ڵێت: ئه‌مشه‌و تا ده‌مه‌و به‌یان مه‌ستبووم مه‌ست.

…………………..

2006

حەمە کاکەڕەش

بڵاوکردنەوە: