دەنگدانەوە

328
0
بڵاوکردنەوە:

نووسینی: ئاسۆ سەڵاح

 

پەنجەکانم دەکەونە سەر گەردنم

لێدانی دەمارەکانم دەپێون

وەک لەدەرەوەی خۆمەوە لێم بڕوانن

چاوم دەکەوێتە سەر دیوارەکان

ئەو دیوارانەی خۆمم لەوان پێ جیاکردەوە،

منداڵێک دەبینم بە قژی ژاکاو و کالەی دڕاوەوە

ڕووخسارێک لە دوکەڵ و با

بە ڕەنگی باران و بۆنی باروت

دەنگێک کە بەردەوام تەشەنە دەکات

 

شەو بۆن بەو شوێنانەوە دەکات کە ناشتومن

ئەو شوێنانەی ئێسکیان نییە تا بڕوێنەوە

 

خەیاڵدانم دەڕژێتە ئێستاوە و دەیشێوێنێ

زەینم دەبات تا کۆڵانە تاریکەکانی شەوی بەرات و

ئەو چاوشارکێیەی خۆمم پێ ون کرد …

دەمباتەوە لای عەرەبانەی لاکۆڵان و میزەڵانی ژمارە سەد

کە هەرگیز بۆم دەرنەچوو …

منداڵانی گەڕەک زەرفە ڕەشەکانیان لە باوکیان وەردەگرت

بەڵام، من و کۆڵانێکی چۆڵ و چاوەڕوانی لە ئاوابوون ڕادەماین

ئەو ئێوارانەی دەنگی دایکم ڕووی پێوەردەگێڕامە سەر لافیتەکەی باوکم

 

بەرماڵە لاڵەکەی دایکم

کیسەیەک ئارد و دینارێکی ئاسن

دوو دەست کە ژیانیان لە نانی بۆر دەردەکرد

دوو چاو کە تەنها لەدەست دانیان دەناسییەوە

 

لەسەری کۆڵانەوە قافڵەی زرێپۆشەکانم دەبینی و

ڕووم وەرگێڕا، بەپڕتاو ڕامکرد ..

نەکا دەنگێک، شێوەیەک، شوێنپێـیەک لە باوکمم تیا بدۆزنەوە

 

نەوەد و شەش  ئاهــ  نەوەد و شەش

 

هەندێک لە زرێپۆشەکان گەڕانەوە و

هەندێکیان چوون بۆ مۆزەخانە

 

باوکم لەسەری کۆڵانەوە دەرکەوت

زلەیەکم لێدا و وتم؛ هێشتا نەمردوویت ؟

 

 

دەنگی زرێپۆشەکان دێنەوە گوێم

ترسی نەگەڕانەوەی باوکمم لەدەستدایە

 

باوکم و منداڵی و فانتازیا و باروتی ڕژاوی ئەو ڕۆژانە

دەکەمە ناو کۆلارەیەک و بە ئاسمانی ئەم کۆڵانانەدا دەیفڕێنم

تا ئەو شەقامە تاریکانە ونکەن کە لێی هەڵتۆقیون

 

شەو بۆن بەو شوێنانەوە دەکات کە ناشتومن

ئەو شوێنانەی ئێسکیان نییە تا بڕوێنەوە .

بڵاوکردنەوە: